Bolalar puli 2026: kimga beriladi, oila daromadi qanday hisoblanadi va nega rad javobi keladi

«Bolalar puli» — kam taʼminlangan oilalarga har oy toʻlanadigan davlat nafaqasi. 2026-yil 1-fevraldan u yagona Ijtimoiy reyestr orqali tayinlanadi: avvalgi «Ijtimoiy himoya yagona reyestri» va «Kambagʻal oilalar reyestri» birlashtirildi. Quyida kim olishi, qancha olishi va eng koʻp rad etilish sabablarini oddiy tilda tushuntiramiz.

Bolalar puli qancha? (2026-yil 1-iyuldan)

Nafaqa bolaga emas, oilaga tayinlanadi. Miqdor eng kichik farzandning yoshiga va farzandlar soniga bogʻliq:

Nafaqa farzand 18 yoshga toʻlgan oy oxirigacha toʻlanadi.

Kim oladi: oila daromadi mezoni

Asosiy shart — oilaning har bir aʼzosiga toʻgʻri keladigan oylik daromad minimal isteʼmol xarajatlari (MIX) bilan solishtiriladi. 2026-yil uchun MIX kishi boshiga 715 000 soʻm.

Oilalar uch toifaga boʻlinadi:

1. Davlat taʼminotidagi oila — aʼzolari mehnatga layoqatsiz yoki layoqati cheklangan, daromad MIXdan kam. Nafaqa toʻliq.
2. Kambagʻal oila — mehnatga layoqatli aʼzolari bor, daromad MIXdan kam. Nafaqa toʻliq.
3. Kambagʻallik chegarasidagi oila — daromad MIXning 1–1,5 baravari oraligʻida:
   • 1 dan 1,25 baravargacha (893 750 soʻm gacha) — nafaqaning 75% i;
   • 1,25 dan 1,5 baravargacha (1 072 500 soʻm gacha) — nafaqaning 50% i;
   • toʻlov 6 oy davomida beriladi.

Oila daromadi qanday hisoblanadi

Formula oddiy:

Kishi boshiga daromad = oxirgi 3 oydagi jami daromad ÷ 3 ÷ oila aʼzolari soni

Daromadga kiradi: ish haqi, mulkdan daromad (masalan, ijara), chet eldan va mamlakat ichidan pul oʻtkazmalari, olinayotgan aliment, haq toʻlanadigan jamoat ishlari va qonunda koʻrsatilgan boshqa daromadlar. Oiladan toʻlanayotgan aliment esa daromaddan ayiriladi.

Daromadga kirmaydi: bolalar nafaqasi va moddiy yordam, nogironlik va boquvchisini yoʻqotganlik pensiyasi, parvarish nafaqalari, homiladorlik va tugʻish nafaqasi, ayrim stipendiyalar, bir martalik davlat toʻlovlari, subsidiya, kredit va grantlar.

Nima uchun rad javobi keladi

Daromad past boʻlsa ham, quyidagi holatlarda oila reyestrga kiritilmaydi:

• Avtomobil. Oilada soʻnggi 12 yil ichida ishlab chiqarilgan soz yengil avtomobil boʻlsa (oilada nogironligi boʻlgan bola yoki I–II guruh nogironligi boʻlgan shaxs boʻlsa — 7 yil). Yuk mashinasi, avtobus kabi texnika uchun — 15 yil. Ikki va undan ortiq soz transport vositasi boʻlsa ham rad etiladi.
• Koʻchmas mulk. Bittadan ortiq uy-joy yoki yer uchastkasi, yoki daromad keltiradigan noturar joy boʻlsa.
• Omonat va qimmatli qogʻozlar. Bankdagi omonat yoki qimmatli qogʻozlar 6 800 000 soʻm (MHTEKMning 5 baravari) yoki undan koʻp boʻlsa.
• Boshqa sabablar: oila aʼzosi ayrim davlat organlarida (huquqni muhofaza qilish, mudofaa) xizmat qilsa, oila doimiy yashash uchun chet elga ketgan boʻlsa, suhbat (anketa) toʻxtatilgan boʻlsa.

Chet elga chiqish yoki kommunal xizmatlardan foydalanish hajmi rad etish asosi emas.

Ariza qanday beriladi

Oyda bir marta ariza berish mumkin. Yoʻllari:

1. Onlayn — my.gov.uz (Yagona interaktiv davlat xizmatlari portali) yoki «Ijtimoiy karta» ilovasi orqali. Shaxs Face-ID, elektron imzo yoki SMS orqali tasdiqlanadi.
2. Shaxsan — Davlat xizmatlari markazi yoki «Inson» ijtimoiy xizmatlar markazida.
3. Mahalla orqali — biriktirilgan ijtimoiy xodimga murojaat qilib.

Arizadan keyin:

• tizim dastlabki tekshiruv oʻtkazadi;
• ijtimoiy xodim 3 ish kuni ichida uyingizga kelib anketa toʻldiradi;
• mahalla «yettiligi» xulosasini 3 ish kuni ichida tasdiqlaydi;
• yakuniy qaror yana 3 ish kuni ichida chiqadi va sizga SMS orqali xabar beriladi.

Foydali maslahatlar

• Daromadni toʻgʻri koʻrsating. Notoʻgʻri maʼlumot aniqlansa, nafaqa toʻxtatiladi.
• Oila tarkibi oʻzgarsa (bola tugʻilsa, kimdir ishga kirsa) — yangi ariza bering.
• Bola tugʻilganda bir martalik toʻlov ham bor — qarang: Suyunchi puli qancha va qanday olinadi.
• Ishlaydigan onalar uchun: Dekret puli qanday hisoblanadi.